Միջին դպրոցի այն աշակերտները, որոնք հետաքրքրվում են մաթեմատիկայով և ցանկանում են իմանալ ավելին, քան ներառված է դասագրքում, հաջողությամբ կարող են օգտվել այս Կ․ Առաքելյանի ձեռնարկի նյութերից:
Երեխաների մտավոր կարողություններն ու նախասիրությունները, ներառյալ մաթեմատիկական մտածողության տարրերը, հիմնականում ձևավորվում են միջին դպրոցում: Այդ շրջանում անգամ այն աշակերտները, որոնք իրենց առաջադիմությամբ աչքի չեն ընկել, նպաստավոր պայմանների առկայության դեպքում կարող են անսպասելի մտավոր ունակություններ ցուցաբերել:
Մաթեմատիկական խնդիրներն ունեն և՛ իմացական, և՛ կիրառական, և՛ անգամ դաստիարակչական նշանակություն: Նրանք զարգացնում են տրամաբանական մտածողությունը, մշակում գիտելիքները կիրառելու գործնական հմտություններ, ձևավորում աշխարհայացք: Խնդիրների լուծումը նրանց մղում է ստեղծագործական աշխատանքի: Սահմանափակվելով միայն դասագրքում ընդգրկված խնդիրներով՝ սովորողները, հնարավոր է, ստանան միայն սերտողական բնույթի գիտելիքներ:
Այս ձեռնարկում ընդգրկված են ինչպես պարզ և միջին բարդության, այնպես էլ դժվարին և ոչ ստանդարտ առաջադրանքներ: Առաջին խմբի վարժություններն իրենց բովանդակությամբ շատ մոտ են դասագրքային խնդիրներին: Դրանցով կարող են նպաստավոր պայմաններ ստեղծվել՝ կրկնելու և վերհիշելու մաթեմատիկայի դպրոցական դասընթացից ստացած գիտելիքները, ինչի շնորհիվ էլ աշակերտը ձեռք կբերի ինքնավստահություն սեփական ուժերի նկատմամբ, պատրաստ կլինի անցնելու ավելի բարդ և ոչ ստանդարտ խնդիրներ լուծելուն:
Գրքում ներառված մյուս առաջադրանքների լուծման համար կպահանջվեն բոլորովին այլ՝ ոչ ստանդարտ մոտեցումներ: Դրանք այսպես կոչված ոչ սովորական, բարդ և տրամաբանական խնդիրներն են: Այսպիսի խնդիրները զարգացնում են երեխայի տրամաբանությունը, մարզում միտքը, առաջացնում դրական հույզեր, հաղթանակի զգացողություն:
Ձեռնարկը լայն հնարավորություն կարող է ընձեռել մաթեմատիկայի նկատմամբ հետաքրքրասիրություն ցուցաբերող երեխաների համար՝ ավելի խորությամբ ուսումնասիրելու իրենց սիրելի առարկան: Այն կօգնի 6-8-րդ դասարանների աշակերտներին՝այն սովորողներին պատրաստվելու մաթեմատիկայի խորացված ուսուցմամբ դասարանների ընդունելության քննություններին, ինչպես նաև մաթեմատիկական օլիմպիադաներին:
Գրքում զետեղված նյութերը կարող են օգտակար լինել նաև մաթեմատիկայի ուսուցիչներին՝ օժտված աշակերտների հանդեպ ուսուցման անհատական մոտեցում ցուցաբերելու և արտադասարանական պարապմունքներ անցկացնելու համար:
