Հետաքրքիր փաստեր թվերի մասին

2 թվի մասին

Նոր ծնված ընձուղտն ունի 2 մ հասակ:

Մարդը լուսնի վրա գտնվել է 2 ժամ:

Մարս մոլորակն ունի 2 արբանյակ:

Նորածին երկնագույն կետը կարող է կշռել 2 տոննա, ինչպես հասուն փիղը:

Լեմուրը (կապիկի նման գազանիկ է) ունի 2 լեզու:

Կենգուրուները ծնվում են շատ փոքր՝ ընդամենը 2 սմ: Բայց շարունակում են մեծանալ ողջ կյանքի ընթացքում:

Թքող կոբրաներն իրենց թունավոր ատամի վրա փոքրիկ անցք ունեն, որտեղից թքում են թույնը: Նրանք թույնը կարող են թքել 2 մ հեռու:

Իսկ քո կարծիքով մարդն ինչու՞ 2 աչք, 2 ականջ ունի:

3 թվի մասին

Ճապոնական ծովային սարդ-խեցգետինն աշխարհի ամենախոշոր խեցգետինն է: Նրա ոտքերի բացվածքը հասնում է 3 մետրի:

Ութոտնուկն ունի 3 սիրտ:

Ոզնու փշերի երկարությունը 3 սմ է:

3 գրամ է կշռում կկվի ձուն:

Աշխարհի ամենախոշոր արջը կոդիակ կոչվող արջն է: Նա ապրում է Ալյասկայում ու կանգնած վիճակում ունի 3 մետր հասակ: Պատկերացնո՞ւմ ես, ավելի բարձր, քան ձեր տան առաստաղն է:

Աֆրիկյան ջայլամն ունի 3 մետր հասակ:

Կապույտ կետի լեզուն 3 տոննա է կշռում. համարյա ամենագնացի քաշին:

9 թվի մասին

9 ամիս շարունակ դու մնացել ես քո մայրիկի փորիկի մեջ, իսկ հետո լույս աշխարհ ես եկել:

Փոքրիկ քամելեոնները ձվի մեջ են մնում 9 ամիս, հետո ձվի կճեպը կոտրում են ու դուրս գալիս:

Լորտու օձի ձմեռային քունը տևում է 9 ամիս. պատկերացնո՞ւմ ես` տարվա մեծ մասը նա քնած է անցկացնում:

10 թվի մասին

Օմարները` փշոտ խեցգետինները, 10 ոտք ունեն:

Կարիճն ունի 10 աչք: Երկուսը մեծ են, մյուսները` մանր:

Կույր օձն ապրում է ավազի մեջ և ընդամենը 10 րոպե արևի տակ մնալով՝ սատկում է:

Մեղուն նեկտար հավաքելու համար ամեն օր ճամփորդում է 10 անգամ: Մեկ ճամփորդության ժամանակ նա կարողանում է վերցնել 1000 ծաղկի նեկտար: Այսպիսով, մեկ մեղուն մեկ օրվա ընթացքում այցելում է 10 000 ծաղկի:

Ջրի տակ լողացող փոկի սրտի աշխատանքը դանդաղում է 10 անգամ:

Պատկերացնո՞ւմ ես, աշխարհում գոյություն ունեն թռչող ձկներ: Նրանք և՛ լողում են ջրում, և՛ թռչում ջրից 10 մետր բարձրության վրա:

6 թվի մասին

Վաղ առավոտյան՝ ժամը 6-ին, բացվում է խատուտիկը:

Ցուլ-գորտի կռկռոցը կարելի է լսել մինչև 6 կմ հեռավորության վրա

Ամենաերկար օձերից են պիթոնները, որոնց երկարությունն անցնում է 6 մետրից:

Սև ալբատրոսը կարող է ավելի քան 6 ժամ սավառնել օդում` առանց թևերը շարժելու:

Վիշապածառի կյանքի տևողությունը 6 հազար տարի է: Տեսնես ո՞վ է տնկում այդ ծառերը: Գուցե վիշապնե՞րը:

Եքիդնայի փշերի երկարությունը 6 սմ է: