Այն, թե ո՛վ է Միկի Մաուսը, ասելու կարիք չկա. նրան բոլորն են ճանաչում՝ թե՛ մեծերը, թե՛ փոքրերը: Իսկ գիտե՞ս, թե երբ և ինչպես է ծնվել այս մկնիկը:
Միկիի «հայրիկը» ամերիկացի աշխարհահռչակ մուլտիպլիկատոր Ուոլտ Դիսնեյն է: Դիսնեյը ստեղծեց Միկիին, իսկ Միկին հռչակ բերեց Դիսնեյին: Նա Միկի Մաուսին ստեղծել է մոտ 100 տարի առաջ: Պատկերացնո՞ւմ ես` ի՜նչ ծեր պապիկ է հիմա Միկի Մաուսը…
Էկրանին հայտնվելուն պես զվարճալի Միկին դարձավ փոքրերի ու մեծերի սիրելին: Հաջողությունն այնքան մեծ էր, որ Դիսնեյն արժանացավ «Օսկար» մրցանակի: Իսկ «Օսկարը», պիտի ասեմ քեզ, կինոյի բնագավառի ամենացանկալի մրցանակն է:
Երեխա ժամանակ Ուոլտը սիրում էր նկարել: Բայց նրա հայրը կարծում էր, որ նկարչությունն անիմաստ զբաղմունք է, և նկարելու համար խստորեն պատժում էր որդոդւն:
Քանի որ Դիսնեյների ընտանիքը դժվար էր ապրում, 8 տարեկանից սկսած՝ Ուոլտը ստիպված էր փող վաստակել թերթեր ցրելով: Արթնանում էր գիշերվա ժամը 3:30-ին ու գնում աշխատանքի (բա՜, այդպես էլ է լինում): Իսկ շաբաթ օրերին գնում էր արվեստի դասերի: Սակայն նրա ամենամեծ երազանքը մուլտ նկարելն էր:
Երբ Ուոլտը մեծացավ, գնաց Հոլիվուդ՝ իր երազանքի հետևից: Գրպանում ուներ չնչին գումար, ընդամենը 40 դոլար: Իր քեռու ավտոտնակում եղբոր հետ Ուոլտը սկսեց համր մուլտեր նկարել…
Գիտես, չէ՞, որ առաջ ֆիլմերն ու մուլտերը համր էին, այսինքն՝ առանց ձայնի: Տեխնիկան դեռ այնքան զարգացած չէր, որ պատկերի հետ նաև ձայն լիներ:
Առաջին հնչյունային մուլտը: Միկիի մասին մուլտն աշխարհում առաջին հնչյունային մուլտը եղավ: Ի դեպ, սկզբում հենց ինքը՝ Դիսնեյն էր խոսում մկնիկի ձայնով:
Հետո Ուոլտ Դիսնեյը սկսեց արտադրել Միկի Մաուսի մասին մուլտերի շարք: Ծնվեցին նաև մյուս կերպարները՝ Դոնալդը, Գուֆին, Պլուտոն, Չիպն ու Դեյլը:
Ուոլտ Դիսնեյի մուլտերը բարի են, ուրախ, լի հումորով ու երաժշտությամբ:
Դիսնեյն արդեն ստեղծել էր անիմացիոն փոքրիկ ստուդիա, որտեղ ստեղծում էր իր մուլտերը: Բայց շուտովայդ փոքրիկ ստուդիան վերածվեց մե՜ծ «Ուոլտ Դիսնեյ» կինոընկերության, որը մինչև այսօր էլ մուլտաշխարհի ամենահայտնի ընկերությունն է: Շա՜տ ու շատ սիրված մուլտեր ստեղծվել են հենց այստեղ: Դրանցից շատերն արժանացել են «Օսկարի»:
Ի դեպ, Դիսնեյը 26 անգամ «Օսկարի» է արժանացել: Մի մարդու համար դա չտեսնված մեծ քանակ է…
Ուոլտ Դիսնեյն այլևս կենդանի չէ, բայց նրա հիմնած կինոընկերությունում այսօր էլ շարունակում են մանուկների համար նոր մուլտեր ստեղծվել:
